Mīles
in Germāniā (cap. I-XV)
Aemilius, Mārcī et Quīntī avunculus, quī in
Germāniā mīlitat, hodiē est in vīllā prope Tūsculum, ubi puerī cum parentibus
suīs habitant. Aemilia, māter Mārcī et Quīntī, frātrem suum adesse gaudet.
Puerī Aemilium interrogant: “Cūr in Germāniā
habitās, avuncule?”
“Magnus est exercitus Rōmānus in Germāniā” inquit
Aemilius “quī contrā hostēs pugnat; in eō exercitū sum mīles.”
Mārcus: “Quō in oppidō habitās, dum in Germāniā
mīlitās?”
Rīdēns respondet Aemilius: “Nōn in oppidō, sed in
castrīs habitō. Castra sunt oppidum mīlitum. Habitō in magnīs castrīs mīlle
passūs ā fīne imperiī.”
Quīntus: “Quot mīlitēs illīc habitātis?”
Aemilius: “In castrīs nostrīs sex mīlia peditum
equitumque habitāmus.”
Mārcus: “Num fēminae et puerī cum mīlitibus
habitant?”
Aemilius: “Nūllae fēminae aut puerī in castrīs
habitant cum mīlitibus, quia nec fēminae nec puerī mīlitāre possunt. Neque
iīs licet castra intrāre. Circum castra fossa lāta est et vāllum duo mīlia
passuum longum et prope decem pedēs altum. Quattuor portae per vāllum in castra
dūcunt, sed cum hostēs castra oppugnant, portās claudimus et vāllum ascendimus.
Pīla in hostēs iacimus et, sī necesse est, gladiīs castra dēfendimus aut ipsī
impetum facimus in hostēs.
No hay comentarios:
Publicar un comentario